Peja - Bashkimi, sonte

Peja dhe Bashkimi do të jetë ndeshja e madhe sonte që do të luhet në kuadër të xhiros së XVIII të BKT Superligës në basketboll. 

Peja, e para në renditje, prej se ka ardhë Dardan Berisha në ekip, nuk din për humbje (hiq një nga Sigal Prishtina) në kampionat. Të verdhit kanë fituar në dy ndeshjet e zhvilluara gjatë stinorit vjeshtor ndaj Bashkimit dhe atë bindshëm. 

Bashkimi që këtë stinor ka arritur të mposht vetëm Trepçën nga katërshja e madhe nuk shkon e dorëzuar në Pejë. Edhe pse shumëkush beson se vetëm koshdallimi pejan do të jetë në pyetje, Bashkimi nuk do të jetë kafshatë e lehtë për t’u kapërdirë nga pejanët. 

Gjithashtu, me këtë ndeshja Peja do të përfundojë luftën me ekipet e TOP katërshes për këtë cikël, pasi që është ndesh me Sigal Prishtinën dhe Trepçën në javët e kaluara. 

Për Bashkimin dhe përforcimet e tij, ky do të jetë dueli i parë ku do të mund të masin forcën dhe cilësinë e tyre. 

Në ndeshjen tjetër që zhvillohet sot, takohen dyshja entuziaste e BKT Superligës, RTV 21 dhe Drita. Teleboysat presin fitore të sigurtë, por Drita me Craig Blackmonin si lider, dëshiron të befasojë edhe kryeqytetasit. 

BKT SUPERLIGA, SONTE:

20:00, Pallati i Rinisë. Prishtinë	RTV 21 - Drita	(1-1) rezultatet e ndeshjeve të ndërsjella	Gjyqtarë: H. Grezda, U. Hasani dhe A. Goçaj
20:00. Karagaç, Pejë	Peja - Bashkimi	(2-0) rezultatet e ndeshjeve të ndërsjella	Gjyqtarë: M. Gashi, D. Mehmeti dhe E. Raqa

FAKT:

1

Bashkimi herën e fundit e ka mposhtur Pejën në gjysmëfinale të Kupës së Kosovës në stinorin e kaluar 2011/12.

FAKT:

1

RTV 21 në stinorin e kaluar e ka mposhtur Dritën 20-0, për shkak të sulmit të basketbollistit Qëndrim Demi (Drita) ndaj referit.