PEJA-YLLI
Peja befason! Shpreson në mbijetesë direkte
15 April, 2018 @18:37
Një xhiro pa përfunduar pjesa e rregullt e stinorit, Peja mund të shpëtojë direkt në Superligë!
Shpresat e verdhezinjëve janë ngjallur sot, pas fitores së ekipit ndaj Yllit, 93-88, në një ndeshje ku vendasit u këndellën në çerek të fundit të ndeshjes për ta fituar atë.
Ylli gjatë gjithë ndeshjes ishte në epërsi, por Peja u këndell për të fituar në fund. Ka qenë Beqë Kovaçi fantastik, me triple-double, 33 pikë, 10 kërcime e 10 asistime që ka ndihmuar ekipin në fitore.
Atij i ka ndihmuar edhe Taulant Dupa me 21 pikë, 11 asistime e 13 kërcime, ndërsa 15 pikë tjera ka shtuar Rron Ukaj në fitore.
Yllit nuk i kanë mjaftuar 22 pikët e Mike Harmonit, derisa ekipi ka përjetuar humbjen e 13 të stinorit.
Peja pas kësaj ndeshjeje ka bilanc të njejtë me Borean, 7-20 dhe gjithçka për ekipin që do të merr pjesë në Play-Out do të vendoset në xhiron e fundit.
