Peja fiton pas vazhdimit, eliminohet Trepça

Skuadra e Trepçës ka pësuar humbje të rëndë sonte në palestrën “Karagaçi” të Pejës, duke u mposhtur nga Peja pas kohës shtesë.

Xehetarët përveçse e humbën rastin për ta fituar ndeshjen në sekondën e fundit të kohës së rregullt, i humbën edhe shpresat për t’u kualifikuar në fazën e dytë të Ligës Ballkanike.

Pjesa e rregullt e ndeshjes përfundoi me rezultat të barabartë 66-66, falë pikëve në sekondën e fundit të amerikanit të Pejës, LaMarcus Reed, i cili e shpëtoi skuadrën e tij nga humbja.

Para tij, Montreal Scott e kishte kaluar Trepçën në epërsi, kur kishin mbetur vetëm edhe 5.5 sekonda para fundit.

Deri në këto çaste, ndeshja gjatë gjithë kohës kishte rezultat të ngushtë, ku epërsia kalonte herë te njëra e herë te tjetra skuadër.

Një faktor tjetër kyç në humbjen e Trepçës në vazhdime ishte edhe përjashtimi i Jeremy Wise me 5 gabime personale.

Koshashënuesi më i mirë në këtë ndeshje ishte Cameron Rundles, i cili shënoi 24 pikë, prej tyre 3 trepikëshe, derisa te Trepça Montreal Scott bëri gjithçka për skuadrën e tij, duke luajtur me shifrat magjike prej triple-double me 16 pikë, 12 kërcime dhe 11 asistime.

TABELA AKTUALE

Me këtë fitore, Peja mbetet në krye të grupit me 6 fitore e 3 humbje, aq sa ka edhe skuadra Feni Industries, derisa Trepça renditet e fundit me 3 fitore e 6 humbje dhe pa shpresë për kualifikim në fazën e dytë.

Në ndeshjen e ardhshme dhe të fundit të kësaj faze, Peja e pret Tiranën në Karagaç, ndërsa Trepça do të jetë mysafire e Sutjeskas.

Peja

Trepça