KARPOS - TEODO
Foto: mak sport
Peja kualifikohet në çerekfinale!
22 February, 2017 @21:55
Skuadra e Pejës pa marrë parasysh rezultatin e ndeshjes së fundit që do ta zhvillojë ndaj Teodos në Karagaç, pritet të sigurojë çerekfinalet e BIBL.
Kjo pasi që në ndeshjen tjetër të Grupit D, Karpos Sokoli ka lëshuar ndeshjen ndaj Teodos pranë rezultatit 60-61 edhe 2.42 minuta pa përfunduar çereku i tretë i ndeshjes, ndërsa faqja zyrtare e BIBL ka regjistruar ndeshjen me rezultat 0-20 për Teodon.
Sipas rregullave, Karposit nuk duhet t’i takojë pika e humbësit, që automatikisht e çon Pejën tutje, përveç nëse BIBL merr vendim tjetër në ndërkohë.
Derisa faqja zyrtare e BIBL thotë se ekipi është tërhequr nga ndeshja pa arsye, mediat maqedonase kanë përcjellë padrejtësitë në referim të kenë qenë arsyeja e tërheqjes së ekipit të Karposit nga ndeshja.
Për më tepër, Mak Sport ka shkruar se Karpos vështirë se do të paraqitet edhe në ndeshjen e fundit të Grupit D, ndaj Kumanovës.
Sa i përket deri momentit të ndërprerjes së ndeshjes, ish basketbollisti i Prishtinës, Bojan Trajkovski ka qenë më i miri te Karposi me 17 pikë të shënuara e 8 kërcime.
