ANTONIS CONSTANTINIDES
Peja, kundërshtarja më e fortë për Prishtinën
Intervista u realizua nga kanali televiziv transmetues i ndeshjes
12 May, 2016 @22:23
Sigal Prishtina me fitoren e sontme ndaj Pejës e ka barazuar serinë finale të Play Offit në 1-1.
Në lidhje me fitoren e sontme të bardhekaltërve, pas ndeshjes foli trajneri i Sigal Prishtinës, Antonis Constantinides, i cili tha se ndihet i kënaqur për lojën e treguar dhe për fitoren e merituar.
“Jam i kënaqur me paraqitjen e ekipit, pasi që në përpikëri i zbatuan lojtarët atë se çfarë i kam thënë. Presioni sigurisht që ishte tek ne për ta fituar këtë ndeshje, duke ditur që patëm pësuar humbje në ndeshjen e parë në Pejë dhe gjithë skuadra kishte pësuar zhgënjim të madh për shkak të humbjes në sekondat e fundit. Megjithatë, ne luajtëm mjaft mirë dhe e merituam fitoren. Gjithashtu e uroj edhe skuadrën e Pejës dhe trajnerin Branimir Pavic për lojën e sontme që e treguan. Besoj se e rëndësishme është që të fitojë skuadra më e mirë dhe nuk është me rëndësi nëse ajo është Prishtina apo Peja,” tha strategu qipriot
Më tej, ai pranoi se kundërshtarja e Sigal Prishtinës në serinë finale të Play Offit, është kundërshtarja më e fortë për t’u përballur, që prej se ai e drejton Sigal Prishtinën.
“Peja është kundërshtarja më e fortë e Sigal Prishtinës prej se unë jam trajner i kësaj skuadre. Gjatë tërë edicioni kemi pasur vetëm një humbje dhe ajo ka qenë pikërisht kundër Pejës. Dallimi mes dy skuadrave nuk është shumë i madh dhe besoj se skuadra që do të jetë më e koncentruar dhe do të bëjë më pak gabime, ajo do ta fitojë edhe kampionatin natyrisht.”
Abukar, në dyshim edhe në ndeshjen e radhës!
Në fund, Constantinides foli edhe për basketbollistin amerikan, Mohamed Abukar, i cili i mungoi skuadrës në këtë ndeshje për shkak të lëndimit.
“Skuadrës po i mungon Abukari. Loja e tij gjithmonë e ka ndihmuar Sigal Prishtinën. Do të shohim nëse do të kthehet në ndeshjen e radhës. Nëse ai do të jetë 100% i gatshëm, edhe do të luajë,” përfundoi Constantinides.
Ndeshja e radhës e serisë finale të Play Offit ndërmjet Sigal Prishtinës dhe Pejës do të luhet në palestrën “Karagaçi” në Pejë.
