Prishtina fiton provën

Sigal Prishtina është treguar skuadër më e përgatitur në krahasim me Sigkos Bashkimin, para fillimit të stinorit pranveror të BKT Superligës.

Ekipi nga kryeqyteti ka shënuar fitore me rezultat të thellë 78-58. Ndryshe nga çereku i dytë, që përfundoi me rezultat të barabartë 20-20, në tre çerekët e tjerë prishtinasit ishin më të mirë se Sigkos Bashkimi.

Kjo ndeshje ishte edhe një rast i mirë për t’i parë përforcimet e reja nga të dyja skuadrat. Për Sigal Prishtinën debutoi qendra Akida McLain, i cili u prezentua sot nga klubi, derisa te Sigkos Bashkimi debutuan Kejuan Johnson dhe Mark Dawson.

Devan Downey i Prishtinës dhe lituanezi Uzas Rokas i Bashkimit nuk u paraqitën fare në këtë ndeshje, për shkaqe të ndryshme.

Gjatë stinorit vjeshtor, Sigal Prishtina kishte shënuar fitore në të dy përballjet me Sigkos Bashkimin, 66-75 në Prizren dhe 79-72 në Prishtinë.