Prishtina me 6 lojtarë kalon lehtë Rahovecin

Sigal Prishtina ka shënuar fitore në duelin e mbetur të xhiros XIV, të zhvilluar sonte ndaj Rahovecit. Ndeshja u zhvillua në Prishtinë, ndërsa Rahoveci ishte në cilësinë e vendasit, por në mungesë të palestrës luajti në kryeqytet.

Bardhekaltërit u paraqitën me 6 basketbollistë në këtë ndeshje, të cilën e fituan lehtë, ndërsa në ekip u paraqitën edhe 4 lojtarë të shkollës së Prishtinës, prej të cilëve vetëm Fisnik Rafuna u fut në lojë për 1.11 minuta.

Fisnik Rugova luajti pa pushim për 40 minuta dhe realizoi double-double me 21 pikë, 11 kërcime dhe regjistroi edhe 6 asistime. Drilon Hajrizi regjistroi gjithashtu double-double prej 23 pikëve dhe 10 kërcimeve.

TABELA AKTUALE

Te Rahoveci më i dalluari ishte ish-lojtari i Prishtinës dhe Bashkimit, Muhamed Hasani që shënoi 29 pikë sonte. Përveç tij, vetëm edhe Mustafë Merovci shënoi pikë dyshifrore te Rahoveci, duke realizuar 19 pikë.

Trajneri i Rahovecit, Jeton Nixha, i ka dhënë hapësirë të gjithë basketbollistëve në dispozicion, me së paku 1 minutë e gjysëm.

Rezultati 114-67 tregon gjithçka sa i përket ndeshjes, ndërsa sipas çerekëve rezultati shkoi 24-10, 26-24, 31-18 dhe 33-15 në të mirë të mysafirëve.

Bardhekaltërit me këtë ndeshje kanë kompletuar të gjitha duelet e mbetura në Superligë dhe tashmë me 14-2 janë liderë të pastër në krye të klasifikimit. Në anën tjetër, Rahoveci ka bilanc 6-9 aktualisht dhe ka edhe një ndeshje mangu për të zhvilluar.

KB RAHOVECI

KB PRISHTINA