Prizreni merr fitoren e parë në Ligë Unike

Prizreni ka shënuar fitoren e parë në kuadër të Ligës Unike, duke e mposhtur Tiranën në Farie Hoti me 12 pikë dallim, 81-93 [19-20, 21-27, 23-17 dhe 18-29].

Basketbollistët e drejtuar nga Arbnor Rifati kanë shpërthyer në çerek të fundit të ndeshjes për të mos lënë vend për befasi, pasi që më parë ata të Erkand Karajt kishin afruar rezultatin në një pikë, 10 minuta para fundit të ndeshjes.

E në 10-minutëshin e fundit Courtney Fells, Ivan Koljevic e Rilind Krasniqi me pikët e tyre kanë shtuar dallimin për të shkuar te fitorja e sigurtë.

Courtney Fells ka luajtur gati tërë ndeshjen sonte, ndërsa ka shënuar 31 pikë, 11 kërcime e 5 asistime në fitoren e Prizrenit. Ivan Koljevic që sonte shutoi për tre pikë 1/7 dha 15 pikë në total, ndërsa Rilind Krasniqi kreu ndeshjen me 13 pikë e 3 kërcime.

Te Tirana Reggie Clark me 21 pikë ishte koshashënuesi më i mirë, ndërsa double-double nga Julian Hamati (19 pikë, 13 kërcime) dhe Endrit Hysenagolli (18 pikë, 17 kërcime) nuk mjaftuan për të bërë më shumë.

Pas kësaj ndeshjeje, Prizreni ka bilans 1-1, ndërsa Tirana gjithashtu bëhet 1-1, pasi që përjetoi humbjen e parë në këtë garë këtë stinor.