Rugova: Ky ekip do të shkruajë histori

Granit Rugova, është lojtari më në moshë i reprezentacionit të Kosovës. Por ikonës së Sigal Prishtinës, nuk i penguan 32 vjetët e tij, kur ai në ndeshjen e parë parakualifikuese për Botërorin “Kina 2019” shutoi 4 dhe shënoi 3 herë për tre pikë në fitoren historike të Kosovës ndaj Maqedonisë.

Graniti ka qenë në parket vetëm 16 minuta ndaj Maqedonisë, por ka qenë koshashënuesi i dytë më i mirë i Kosovës në fitore. Përvoja flet, 75% i saktë për tre pikë, 75% nga gjuajtjet e lira - që në ndeshje të tillë, edhe përcakton fituesin.

SHIKO: Orarin e ndeshjeve dhe Tabelat aktuale

Kundërshtari i radhës, Estonia.

“Me të njejtën dëshirë, qasje dhe motivim do të nisemi për Estoni,” ka thënë fillimisht Graniti në bisedën e tij me Borozani.com.

“Nëse arrijmë të bëjmë lojën e njejtë si ndaj Maqedonisë, do të fitojmë edhe atë lojë. Jam shumë optimist për këtë,” ka shtuar 9-shja e reprezentacionit të Kosovës.

Ndërsa i tërë ky motivim vjen prej fitores së madhe ndaj Maqedonisë.

“E pamë që mundemi. Kjo tashmë vjen natyrshëm pasi që e mposhtëm Maqedoninë. Do të shkruajmë histori me këtë ekip që kemi,” ka përfunduar Rugova.

Kosova më 9 gusht ndeshet me Estoninë në Talin, në kuadër të xhiros së tretë të ndeshjeve parakualifikuese për Botërorin “Kina 2019”. Xhiroja e dytë luhet sot, por Kosova e ka ditë të lirë, pasi që Grupi C përbëhet prej 3 ekipeve.