Shqipëria pa Gjimshitin për ndeshjet e tetorit

Një hendikep i madh për Shqipërinë para ndeshjeve të tetorit. Edhe pse gjindej në listë të të ftuarve nga Sylvinho, sot edhe zyrtarisht u bë me dije se kapiteni Berat Gjimshiti nuk do të mund të jetë pjesë e grumbullimit dhe ndeshjeve të tetorit në kuadër të Ligës së Kombeve me kuqezinjtë.

“Departamenti i Komunikimit në FSHF bën me dije se kapiteni Berat Gjimshiti nuk do të jetë i gatshëm për Kombëtaren në sfidat e radhës në UEFA Nations League ndaj Çekisë dhe Gjeorgjisë për shkak dëmtimi.

Mbrojtësi kuqezi pësoi një dëmtim në ndeshjen e Champions League, Shakhtar Donetsk – Atalanta dhe pas përfundimit të pjesës së parë nuk zbriti më në fushë. Gjimshiti nuk ishte i grumbulluar me Atalantën edhe në ndeshjen e fundjavës në kampionat ndaj Genoa.

TABELA AKTUALE & REZULTATET

Stafi mjekësor i Kombëtares shqiptare ka qenë në komunikim të vazhdueshëm me atë të Atalantës dhe është vendosur që Gjimshiti të mos rrezikojë, që të rikuperohet sa më parë dhe të rikthehet sa më shpejt në fushën e lojës.

Lista përfundimtare e Kombëtares është me 23 futbollistë pasi trajneri Silvinjo dhe stafi teknik kanë vendosur që të mos thërrasin tjetër lojtar në mungesë të Gjimshitit.” — ka bërë të ditur FSHF në një komunikatë të lëshuar në mëngjesin e sotëm.

Gjatë shtatorit Shqipëria arriti një fitore dhe një humbje në Grupin 1 të Ligës B të Kombeve. Pasi mposhti Ukrainën jashtë, u mposhtë nga Gjeorgjia brenda. E në tetor të përzgjedhurit e Sylvinhos i presin dy duele jashtë vendit, ku kuqezinjtë ndeshen me Çekinë më 11 tetor e pas kësaj më 14 tetor shkojnë në Gjeorgji.