Sigal Prishtina refuzohet nga ABA Liga?!

Skuadra e Sigal Prishtinës thuhet të ketë marrë refuzimin nga ABA Liga, ku aplikoi ditë më parë për pjesëmarrje.

Gazeta maqedonase Makedonski Sport ka bërë të ditur sot në faqen e saj se ekipi është refuzuar pas kërkesës për pjesëmarrje në ligën e Adriatikut.

“Kemi pranuar kërkesën nga ekipi Sigal Prishtina. Nuk ka shumë çka të diskutohet aty. Rregullat janë të qarta për pjesëmarrje në ABA Ligë. Nuk mundet çdo ekip të jetë pjesë e kësaj lige. Kur u themelua kjo ligë, FIBA na kërkoi që të shkruajmë rregullat. Ne e dimë që vetëm 6 shtete mund të japin pjesëmarrës në Ligën e Adriatikut dhe ligat e këtyre shteteve,” citon Sporti maqedon drejtorin e kësaj lige, Kresimir Novosel.

Akti i themelimit të kësaj lige thotë që në ABA Ligë mund të marrin pjesë ekipet nga këto vende: Sërbi, Slloveni, Kroaci, Mali i Zi, Bosnje e Hercegovinë dhe IRJ Maqedoni.

Për më tepër, Novosel ka thënë se Sigal Prishina këtë mund ta bëj vetëm përmes ligës së Serbisë!!!

Pritet të shihet se si do të veprojë tash Sigal Prishtina, pasi që sipas këtij njoftimi shihet se drejtuesit e ABA Ligës nuk e konsiderojnë ende Kosovën si shtet.