TEAM OF THE WEEK
TOP 5-shja e javës në Superligë (20)
17 January, 2020 @18:13
Pas ndeshjeve të përfunduara të xhiros së 20 në Superligën e Kosovës në basketboll, TopSporti.com ka përzgjedhur pesëshen e javës bazuar në performancat individuale të lojtarëve.
Ekipin e javës e përbëjnë: Jordan Johnson (Prishtina), Corey Raley-Ross (Bashkimi), Joshua McFolley (Rahoveci), Mikaile Tmusic (Prishtina) dhe Arbër Berisha (Ylli).
Kampionia aktuale e Superligës së Kosovës, Prishtina, e mposhti Prizrenin me rezultat 91-76.
Jordan Johnson dhe Mikaile Tmusic, me performancat e tyre arritën të hyjnë në pesëshen e javës. Për Johnsonin kjo ishte ndeshja e dytë e tij në Superligën e Kosovës, por siç duket fazën e adaptimit e paska kaluar. Ai luajti me double-double prej 23 pikëve e 11 asistimeve, derisa i rrëmbeu edhe 4 kërcime, ndërsa Tmusic u dallua me 21 pikë, 9 kërcime, 4 asistime dhe 1 top të rrëmbyer.
Bashkimi në ndeshjen kundër Trepçës, që ishte në shumicën e kohës në disavantazh, arriti ta mposhtë kundërshtarin në sekondat e fundit.
Më i miri në këtë ndeshje ishte Corey Raley-Ross. Ross shkëlqeu me 26 pikë, 10 kërcime, 2 asistime e 2 topa të rrëmbyer.
Rahoveci me lehtësi e mposhti Feronikelin. Joshua McFolley shkëlqeu me 22 pikë, derisa ishte i saktë nga vija e treshit 6 herë në 7 tentimet e tij.
Pesëshen e javës e mbyll Arbër Berisha i Yllit. Berisha kundër Lipjanit luajti me 20 pikë e 6 kërcime, derisa luajti me përqindje të lartë të shënimeve.