Vëllaznimi vazhdon edhe me Rron Dahsylën

Edhe një ekip i Superligës po punon mjaft me lojtarët vendorë, ndërsa Vëllaznimi ka vazhduar bashkëpunimin me Rron Dahsylën së fundi. Njoftimin e dha Vëllaznimi mbrëmë, ndërsa Dahsyla 18-vjeçar do të vazhdojë të qëndrojë kuqezi.

Basketbollisti 18-vjeçar që luan në pozitat 1-2 me 193-centimetrat e tij në stinorin e kaluar ka kontribuuar në 17 ndeshje kampionale për Vëllaznimin, ku ka pasur mesatarisht 12-minuta për lojë, ndërsa ka dhënë 2.5 pikë për ndeshje.

Këtë verë, Dahsyla ka qenë pjesë e Kosovës me kombëtaren U-18 dhe U-20. Te Kosova U-18 ka pasur mesatarisht 32.6 minuta për nedshje me 12 pikë për lojë mesatarisht. Ndërsa te Kosova U-20 ka pasur 20.5 minuta për ndeshje mesatarisht me 4 pikë për lojë.

“Me kënaqësi ju njoftojmë se kemi vazhduar bashkëpunimin me njërin prej lojtarëve perspektiv vendor, Rron Dahsylën.
18 vjeçari që edhe gjatë stinorit të kaluar ishte pjesë e jona, do të ketë mundësi shumë të mirë për tu zhvilluar nën urdhërat e trajnerit lituanez, Audrius Prakuraitis.
Dahsyla gjatë kësaj vere, është paraqitur me dy Përfaqësueset e reja të Kosovës, fillimisht me U20 në Evropianin e Divizionit B në Shkup e më pas edhe në Matosinhos të Portugalisë me U18 poashtu në Divizionit B, ku zhvilloi paraqitje shumë të mira.
Djali i qytetit, e ardhmja e klubit.” - ka shkruar KB Vëllaznimi në njoftim.

Përndrsyhe Dahsyla është vazhdimi i radhës te Vëllaznimi pas Atik Koshit e Shëndrit Llapit, kurse pos tjerash ka afruar në ekip edhe Donat Rexhepin, Ardit Pepajn.

Vëllaznimi në stinorin e kaluar 2022/23 iu rikthye Superligës, ndërsa arriti mbijetesën pas një lufte të madhe. Gjakovarët me pozitën e gjashtë siguruan edhe playoffin. Këtë stinor, Vëllaznimi duket se kërkon që të konsolidohet sa më herët dhe të bëhet ndër skuadrat që nuk brengoset fare për rrezikimin e statusit elitar.