Vugdalic afër Studentit!

Skuadra e re e basketbollit në Kosovë e cila pas vetëm një viti në Ligën e Parë arriti që të inkuadrohet në BKT Superligë, Studenti, ka plane afatmesme që brenda dy deri tre vitesh të krijojë një ekip stabil dhe të aftë të garojë për titull kampioni. 

Nga burimet brenda klubit mësohet se ata janë në kontakt me ish trajnerin e Pejës dhe Bashkimit, Muharem Vugdalic. Ndërsa këtë të dhënë e ka vërtetuar edhe kryetari i klubit pejan, Arbër Elshani. 

“Jemi në kontakt me trajnerin Muharem Vugdalic, mirëpo na kanë mbetur edhe disa detaje për t’i përcaktuar. E dime që ai është i njohur për punën me të rinjtë dhe ekipit tonë të ri do t’i ndihmonte shumë,” shpreson Elshani, i cili ka vazhduar të tregojë ambiciet e tij. 

“Studenti në Superligë do të jetë ky që është - kryesisht me lojtarë të rinj të moshës 20-21 vjeçare dhe pritet të vinë edhe dy përforcime nga Shqipëria. Gjatë verës do të angazhojmë edhe një qendër amerikane dhe pak a shumë ky do të jetë Studenti i BKT Superligës,” dukej ambicioz Elshani. 

Klubi i basketbollit Studenti javën e ardhshme mban Kuvendin e rregullt zgjedhor ku Elshani pritet të rizgjidhet kryetar, për të vazhduar planet e parashtruara, derisa pas tre vitesh e sheh skuadrën e tij me ekip të fortë për të synuar titullin e kampionit!