Ylli mposht Rahovecin në sekondën e fundit

Rahovecit sot i ka ikur nga dora fitorja më e madhe që do të mund ta merrte në Superligë. Ekipi i Rahovecit është mposhtur në sekondën e fundit të ndeshjes nga Ylli, 69-70.

Pas lojës me time-outa të trajnerëve në minutat e fundit të ndeshjes, pranë rezultatit 69-68 në të mirë të Rahovecit, Muhamed Hasani nxorri faul.

Por, Hasani, 8 sekonda para fundit të ndeshjes nuk arriti të shënojë asnjërën nga 2 tentimet që i kishte nga vija e gjuajtjeve të lira.

TABELA AKTUALE E SUPERLIGËS

E në ato të mbetura, Ylli shkoi në sulm të shpejtë ku Trae Anderson u faulua nga Besnik Sharku. Anderson, kur semafori tregonte edhe 2 sekonda deri në fund të ndeshjes është treguar akull i qetë para publikut të shumtë në palestrën Shani Nushi, për të shënuar të dyja tentimet dhe për t’ia sjellë fitoren tepër të vështirë ekipit të tij, 69-70.

Ndeshja ka qenë shumë e ngushtë, posaçërisht në çerek të fundit, kur epërsia ndërrohej prej minuti në minutë, ndërsa Rahoveci ka dështuar të shënojë fitoren më të madhe të tyre për stinorin debutues në Superligë.

PERFORMANCAT E LOJTARËVE

Muhamed Hasani dhe Besnik Sharku përfunduan ndeshjen me double-double te Rahoveci. Hasani shënoi 14 pikë dhe 10 asistime, ndërsa Sharku 14 pikë e 13 kërcime në këtë ndeshje.

Me 14 pikë e përfundoi ndeshjen edhe Taylor Deihl i Rahovecit, që shënoi 2 pikë më shumë sesa Mustafë Mervoci, që regjistroi edhe 7 kërcime.

Në anën tjetër te Ylli rol të madh në fitore ka luajtur Ergin Grosha dhe amerikani Chris Olivier.

Grosha luajti me 17 pikë e 9 kërcime, ndërsa Olivier regjistroi double-double prej 16 pikëve dhe 12 kërcimeve në fitoren dramatike.

Ylli tash ka bilanc 8-9, ndërsa Rahoveci 6-10.

RAHOVECI

GOLDEN EAGLE YLLI