950€ gjoba finalistëve

Skuadra pejane dhe ajo prishtinase janë dënuar së bashku në shumën prej 950 eurove, pas dy ndeshjeve të para të serisë finale të Play-Offit ka njoftuar FBK-ja sot në Informatorin e radhës. 

Për shkak të gabimeve teknike, të dyta me radhë të Samir Shaptahovicit dhe Valdet Grapcit, është akumuluar dënimi prej 200 eurove, ndërsa 350 euro tjera Pejës i janë shqiptuar për shkak të fyerjeve në baza familjare të basketbollistëve të Sigal Prishtinës (Fahri Breca dhe Edmond Azemi), pastaj hudhjes së gjësendeve në fushën e lojës si dhe ndezjes së fishekzjarreve dhe tymosjes së sallës si pasojë. 

Në anën tjetër, gjobat për Sigal Prishtinën kanë ardhur për shkak të fyerjeve ndaj Gerti Shimës, Dardan Berishës dhe Samir Shaptahovicit, pastaj hudhjes së gjësendeve të forta në parket si dhe kritikës së hapur të zyrtarit të klubit, Florian Miftari, ndaj gjykimit dhe gjyqtarëve pas ndeshjeve të zhvilluara. 

Ndeshja e tretë e serisë finale të BKT Superligës është përcaktuar të luhet të enjten mbrëma në Karagaç të Pejës, ku në rast fitoreje Peja do të shpallet kampione e Kosovës.