Prishtina reagon përsëri

Në konferencën e jashtëzakonshme për shtyp të mbajtur sot në zyret e Sigal Prishtinës, është adresuar edhe një reagim i prishtinasve ndaj KB Peja dhe kreu të Federatës së Basketbollit të Kosovës. 

Komunikatën e Sigal Prishtinës po ua sjellim në tërësi ashtu që të mos shkaktohet huti në opinion. 

REAGIM I KB “SIGAL PRISHTINA”

“Konflikti i Interesit “Babë e Bir” paraqet Mision të Pamundur udhëtimin e KB “SIGAL Prishtina” në Pejë

20 maj 2013

KB “SIGAL Prishtina” falenderon të gjithë dashamirët e basketbollit e në veçanti “Plisat” për atmosferën e krijuar në ndeshjen e dytë të finales së Play-Off’it. Atmosfera e krijuar dhe organizimi i ndeshjes u vlerësua me notën më të lartë edhe nga drejtuesit e Balkan League (BIBL) të cilët ishin të pranishëm në këtë ndeshje. Mirëpo, pas analizës së bërë të dy ndeshjeve dhe të zhvillimeve të ditëve të fundit që nga loja e parë në Pejë kur u sulmua autobusi i klubit tonë me ç’rast u rrezikua jeta e lojtarëve dhe stafit të klubit tonë, e deri te shantazhet që na u bënë në forma të ndryshme nga kryetari i FBK-së, shprehim indinjatën tonë për mënyrën se si po udhëheqet basketbolli kosovar. Mbi të gjitha, na shqetëson fakti që vetëm në ligën tonë dhe askund tjetër në botë ekziston konflik i hapur i interesit, ku babai është kryetar i FBK-së e i biri kryetar i klubit që kërcënon me moszhvillim të ndeshjes e në emër të kësaj babai i tij shantazhon klubin tonë madje deri te kërcënimi për mospjesëmarrjen tonë në Ligën Ballkanike. Edhe pse ky konflikt interesi ka ekzistuar që nga fillimi, ne kemi dashur të besojmë në vullnetin e mirë të familjes Gashi. Pasi që dolën në sipërfaqe haptaz tendencat dhe veprimet konkrete për ta favorizuar Pejën, ne kërkojmë që të sqarohet ky konflikt i interesit dhe kërkojmë dorëheqjen e kryetarit. Nëse një gjë e tillë nuk ndodh, ne e shohim udhëtimin e ekipit tonë në Pejë si mision të pamundur dhe të rrezikshëm.

KB “SIGAL Prishtina” do të jetë gjithmonë në shërbim të avancimit të basketbollit dhe të promovimit të tij edhe jashtë kufinjve të Kosovës. Por, nuk do të jemi pjesë e një organizimi ku ekzistojnë konflikte klasike të interesit.

KB “SIGAL Prishtina” ka filluar përgatitjet për sezonin 2013/2014 për Ligën Ballkanike dhe me drejtuesit e saj ka planifikuar një agjendë takimesh për t’u përgatitur sa më mirë në të gjitha drejtimet për paraqitjen e parë në këtë ligë.”

Këtu përfundon reagimi i Sigal Prishtinës dhe pritet të shihet se çka do të ndodh në ditët në vijim. Peja udhëheq 2-0 serinë finale të BKT Superligës dhe është vetëm një fitore larg të qenit kampion.