ALL STAR TURQI
Spahi e Kuqo, kandidohen për All-Star
3 January, 2015 @17:03
Basketbollisti nga Kosova, Kenan Spahi, dhe ai nga Shqipëria, Ermal Kuqo, janë dy nga kandidatët e shumtë të cilët synojnë të jenë pjesë e ndeshjes All-Star të Ligës TBL të Turqisë, ligë kjo e vlerësuar si ndër më të fortat në Europë.
All-Stari do të mbahet me 17-18 janar në kryeqytetin turk Ankara, ndërsa Kenanit dhe Ermalit iu nevojitet sa më shumë vota për të siguruar një vend në ekipet e tyre.
Ndryshe nga ndeshjet e mëparshme të All-Starit në Turqi, kur luanin skuadra e vendorëve kundër të huajve, sivjet ndarja është bërë gjeografikisht, përkatësisht përzgjedhja nga skuadrat e pjesës europiane të Turqisë, kundër asaj të pjesës aziatike të këtij vendi.
Kështu, Kenani dhe Ermali mund të jenë vetëm kundërshtarë në këtë ndeshje, pasi i pari është kandiduar në përzgjedhjen aziatike, derisa i dyti në përzgjedhjen europiane.
Të drejtë vote për Kenani dhe Ermalin kanë të gjithë, nëpërmjet faqes zyrtare të ligës TBL.
Spahi është pjesë e skuadrës Fenerbahçe Ulker, derisa Kuqo sivjet po luan për skuadrën e Darussafakas.
