SHIMA
Arsyeja për të qenë kampion
4 May, 2013 @22:25
Sa më gjatë që rrin basketbollisti në ekip, aq më mirë komponohet në ‘te. Kjo dihet. Edhe pse në Kosovë dhe në BKT Superligë jemi mësuar t’i shohim ndërrimet e lojtarëve të huaj shpesh, kjo nuk ka ndodhur me një lojtar që ka qenë arsyeja pse Trepça u shpallë kampion stinorin e kaluar dhe pse të mos shpallet edhe Peja për të njejtën arsye!
Fjala është për lojtarin e huaj që qëndron në skuadër gjatë gjithë stinorit, nga fillimi deri në fund. E këtë e ka bërë Trepça në stinorin e kaluar me alon amerikane Jaleel Nelson, ndërsa Peja këtë stinor me shqiptarin Gerti Shima. Nelson në stinorin e kaluar dhe Shima këtë stinor, janë basketbollistët e vetëm të huaj që kanë qëndruar gjatë gjithë stinorit në ekipet e tyre.
Gerti Shima ka qenë njëri ndër transferet më të bujshme që ka bërë Peja gjatë tërë stinorit, ndërsa ky ka qenë tejet i mirë gjatë gjithë kampionatit - duke marrë edhe nofkën nga pejanët, Air Shima. E njejta gjë stinorin e kaluar ka qenë në Mitrovicë me Jaleel Nelsonin.
Trepça kishte humbur dy ndeshjet me Sigal Prishtinën në Prishtinë gjatë stinorit të rregullt dhe dy ndeshjet e para si mysafir në finale të Play-Offit, për ta fituar të pestën si mysafir në finale. Edhe Peja ka humbur dy ndeshjet me Sigal Prishtinën gjatë stinorit të rregullt dhe nëse nuk ndodh ndonjë befasi - këto dy skuadra do të takohen në finale të Play-Offit.
Kontinuiteti është rrugë gati e sigurtë drejt suksesit. Ndoshta dikush mund të thotë që Peja nuk arriti të fitojë Kupën, të cilën vjet e arriti Trepça, por dallimi në atë ka qenë vetëm fati, pasi që Peja humbi nga Sigal Prishtina në finalen e Sezai Surroit për vetëm një pikë, ku në çerekun e fundit rezultati ka qenë 4-7 në të mirë të Pejës (55-54 rezultati final).
Dallimi i vetëm është se Gerti Shima si shqiptar që është, prej stinorit tjetër do të konsiderohet si lojtarë vendor, pasi që FBK-ja ka marrë vendim që nga stinori i ardhshëm lojtarët shqiptar nga cilido vend jashtë Kosovës të konsiderohen si jo të huaj.