Asnjë nga ekipet kosovare

Asnjëri nga basketbollistët e Sigal Prishtinës dhe Pejës nuk kanë arritur të futen në TOP 10-shen e basketbollistëve më të mirë të javës në Balkan League sipas Eurobasketit. 

Në llogarinë që e bën Eurobasket, sipas efiçencës së lojtarit në ndeshje, asnjëri nga basketbollistët si kosovar ashtu edhe ndërkombëtar që luajnë te dy ekipet tona përfaqësuese në Balkan League këtë xhiro nuk kanë arritur të plasohen në dhjetëshen më të mirë. 

Serbi Rade Dzambic i Craiovës, ka marrë epitetin e më të mirit të javës, ndërsa pas tij kanë ardhur bullgarët Stanimir Marinov dhe Ivan Lilov të Balkanit të Botevgradit të cilët kanë shkaktuar humbjen e parë të Kozuvit këtë xhiro. 

Basketbollisti i Prishtinës, Kendrick Jones ka qenë i shpalluar basketbollisti më i mirë i xhiros së parë të kësaj lige, derisa po i njejti kishte zënë vendin e tretë te më të mirët e xhiros së dytë. 

Xhiroja e ardhshme e Balkan League ia nis më 12 nëntor dhe vazhdon deri në të 14-tin. Peja i shkon mysafir Kumanovës me të 12-tin, derisa Sigal Prishtina pret Teodon në Pallatin e Sporteve dhe të Rinisë dy ditë më vonë. 

Sigal Prishtina është lidere e Balkan League pas tre xhirove me dy fitore dhe një humbje, derisa Peja e fundit në renditje me dy humbje nga dy ndeshjet e para.