Bashkimi liron dy amerikanë

Dyshja amerikane që zëvendësoi dyshen malaziase te Bashkimi në mes të gjysmëstinorit vjeshtor, King Tawaski dhe Noel Johnson, nuk do të jenë më pjesë e ekipit prizrenas. 

Në një njoftim të dërguar nga klubi portokall-e-zi është bërë e ditur se amerikanët në fjalë janë liruar nga klubi. 

“Duke i falenderuar për sjelljen e tyre profesionale, angazhimin dhe kontributin e dhënë për klubin, basketbollistëve King Tawaski dhe Noel Johnson, u dëshirojmë suksese në karrierën e tyre të mëtutjeshme,” shkruan në njoftim. 

Tawaski në ndeshjet e zhvilluara për klubin prizrenas arriti mesatare prej 9.7 pikëve dhe 4.9 kërcimeve për ndeshje, derisa Johnson kishte mesatare prej 2 pikëve për ndeshje, pasi që pati minutazhë të vogël nën udhëheqjen e Miodrag Baleticit. 

Me këtë, tani Bashkimi do të hidhet në gjah për dy vendet e zbrazta nga të huajt - për t’i mbushur ato para fillimit të gjysmëstinorit të dytë. 

Ekipi prizrenas me bilanc 9-5 ka zënë pozitën e tretë në tabelë të klasifikimit, menjëherë pas dyshes Sigal Prishtina dhe Peja.