Bashkimi përforcohet me Lampley

Fundori amerikan i Teodos nga Tivati, Darrell Lampley, është përforcimi më i ri i Bashkimit të Prizrenit. Lampley 25 vjeçar pritet të arrijë brenda këtyre ditëve në Prizren për t’iu bashkuar ekipit të tij të ri. 

Sipas burimeve nga klubi prizrenas, ai do të qëndrojë në Prizren deri në fund të këtij gjysmëstinori në testim dhe nëse e kalon këtë fazë testuese mund të mbetet edhe për pjesën pranverore te ekipi i portokalltë. 

Lampley ditë më parë ishte lëshuar nga Teodo, pasi që ata kishin marrë një përforcim tjetër para ndeshjes me Pejën. Ai ka pasur minutazhë të vogël në Teodo, me mesatare prej 8.7 minutash dhe 2.5 pikësh për ndeshje në ligën elite të Malit të Zi, derisa në Balkan League kishte minutazhë mesatare prej 15.1 për ndeshje si dhe 7 pikë për ndeshje. 

Bashkimi ka reaguar menjëherë pas largimit të amerikanit Justin Cecil, i cili i kishte befasuar edhe drejtuesit e skuadrës me kërkesën e tij, për shkak të problemeve familjare.

Bashkimi gjindet aktualisht në vendin e pestë të tabelës me bilanc negativ 5 fitore e 7 humbje.