Teodo përforcohet para ndeshjes me Pejën

Skuadra malaziase Teodo që sot pritet të arrijë në Pejë ndërsa nesër të ndeshet me ekipin pejan në kuadër të ligës ballkanike ka arritur marrëveshje me fundorin serb, Milijan Bocka. 

Bocka, i cili në dy stinorët e fundit ka luajtur për ekipin boshnjak, Igokea, ka pasur mesatare prej 4.6 pikëve dhe 1.7 asistimeve për ndeshje. Ai është shpallur kampion dhe fitues i Kupës boshnjake me Igokean. 

Me ardhjen e tij Teodo ka larguar amerikanin Darrell Lampley, derisa më parë alo qendra Takais Brown ishte larguar për të ardhur në Kosovë, te ekipi i Dritës. 

Bocka 31 vjeçar pritet të debutojë për Teodon në ndeshje ndaj Pejës, derisa malaziasit kanë vetëm një fitore pas shtatë ndeshjeve të zhvilluara. Peja gjithashtu ka vetëm një fitore në ligën ballkanike, të cilën e arriti në xhiron e fundit ndaj Craiovës rumune. 

Edhe Peja nuk ka ndenjur duarbosh këto ditë dhe ka paralajmëruar rikthimin e Mario Edwardsit në ekip. Ai pritet të arrijë në Pejë për ndeshje ndaj Teodos. 

Ndeshja ndërmjet Pejës dhe Teodos zhvillohet nesër mbrëma në palestrën Karagaç.