Cecil largohet nga Bashkimi

Skuadra e Bashkimit i ka ndarë rrugët me basketbollistin amerikan, Justin Cecil.

Drejtuesit e klubit portokall e zi kanë njoftuar se Cecil është nisur për në shtëpinë e tij, për shkak të disa problemeve familjare dhe gjithashtu kanë bërë të ditur se vendimi është marrë urgjentisht me kërkesë të lojtarit, kërkesë kjo e cila ka hasur në mirëkuptim të kryesisë dhe se nuk ka të bëj asgjë me rezultatet dëshpëruese të skuadrës në dy ndeshjet e fundit ndaj Kastriotit dhe Trepçës si vendas.

Amerikani i vetëm te prizrenasit, ka pasur 11 paraqitje në Superligë, duke regjistruar mesatare prej 12 pikëve për ndeshje, derisa paraqitjen më të mirë e ka pasur në ndeshjen kundër RTV 21 kur kishte realizuar 22 pikë.

Me largimin e Cecil-it, Bashkimi mbetet me tre të huaj dhe që të tre janë nga Kroacia.

Deri në përfundim të stinorit vjeshtor kanë mbetur edhe dy xhiro. Bashkimi në xhiron e parafundit do të jetë mysafir i RTV 21-shit, e më pas do ta pret Dritën e Gjilanit.