Beciragic: Kështu s’guxojmë të luajë në ndeshjet e radhës

Trajneri i Golden Eagle Yllit, Adis Beciragic, ka qenë i kënaqur me lojën e skuadrës, por vetëm atë të paraqitur në pjesë të dytë të ndeshjes ndaj Prishtinës.

Golden Eagle Ylli ka startuar me fitore në Ligën Unike duke mposhtur Prishtinën, që befasisht luajti pa lojtarët e huaj në ekip dhe u mposht me 17 pikë dallim, 87-70.

Mirëpo, trajneri i suharekasve ka thënë se loja e pjesës së parë nuk guxon të përsëritet në ndeshjet e vështira që presin skuadrën, pasi që kundërshtarët më të fortë, do t’i dënojnë ata.

“Së pari urime Prishtinës dhe trajnerit të tyre për lojën e treguar. Ne do të pushojmë të enjten pastaj do të shohim përgatitjet për ndeshjet e radhës, pasi që kemi lojëra të rëndësishme. Do të shikojmë mundësinë për të dalë direkt në gjysmëfinale të PlayOffit,” ka thënë Beciragic pas ndeshjes, duke aluduar më shumë në përballjen e fundit që e kanë në Superligë ndaj Rahovecit, rivalit direkt për këtë pozitë.

Ai ka treguar se prej se ka arritur aty është duke bërë përgatitje të veçanta për secilën ndeshje. Mirëpo, kjo ndaj Prishtinës së fundi nuk ka funksionuar.

“Ne u përgatitëm shumë për Prishtinën dhe kishim bërë plane si të ndalim Nigelin dhe lojën e tij, por Prishtina doli pa të huaj dhe na befasoi, që na shtyu të ndërrojmë lojën. Edhe kjo ishte vështirë, pasi që ne u desht të ndërrojmë taktikë përgjatë ndeshjes,” ka shtuar ai.

Ndërsa sa i përket lojës dhe përqindjes së shutit ai ka qenë i qartë. Pjesa e dytë dukshëm më e mirë për Golden Eagle Yllin.

“Shumë më thjeshtë kemi luajtur në pjesë të dytë dhe arrinim te pikët. Në pjesë të parë kemi humbur shumë mundësi për të dalë shpejt fast-break. Mundësi kemi pasur, por nuk i kemi përdorur, e kjo mund të na revanshohet ndaj kundërshtarëve më të fortë. Pas pushimit menjëherë do të nisim përgatitjet për Rahovecin në Superligë, e pas kësaj për duelin gjysmëfinal të Ligës Unike,” ka thënë Beciragic në fund.

Kujtojmë, Ylli në Superligë është duke luftuar për pozitë të dytë në renditje. Deri në fund të stinorit është edhe një xhiro. Dhe ndeshja do të vendoset ndaj rivalit direkt për këtë pozitë, ndaj Rahovecit. Të dyja skuadrat kanë bilans 17-10 dhe fituesi i përballjes do të sigurojë gjysmëfinalen e PlayOffit, ndërsa humbësi do të duhet të luajë edhe çerekfinale.

Në anën tjetër, suharekasit me fitore ndaj Prishtinës në çerekfinale të Ligës Unike kanë siguruar gjysmëfinalen ku do të ndeshen ndaj Goga Basketit.