Trajneri i Goga Basket: Ëndrra u bë realitet

Skuadra Goga Basket u kualifikua në gjysmëfinale të Ligës Unike, duke e mposhtur Tiranën me rezultat 76-67.

RAPORTI I NDESHJES

Trajneri i Gogës, Melzin Lazimi, në deklaratën e tij pas ndeshjes tha se me organizimin e kësaj lige u bë realitet një ëndërr, ndërsa lidhur me ndeshjen tha se megjithëse kishte emocione në fillim dhe shkëputje të lojës në çerekun e tretë, skuadra e tij kishte bindjen e plotë gjatë gjithë kohës për fitore.

“Besoj se u pa nga fillimi i ndeshjes që pati emocione nga të dyja skuadrat. Kemi kaq kohë që e presim këtë ligë, është një ëndërr që bëhet realitet dhe dua t’i përgëzoj gjithë faktorët që e bënë këtë ligë të mundur.”

“Ndeshja filloi mirë për ne. Patëm lojë të mirë në pjesën e parë, por në periudhën e tretë patëm shkëputje nga loja. Ndoshta ai momenti ishte vetëm një minutë, por pastaj nga ai moment një minutësh është shumë vështirë të kthehesh në lojë me maksimumin. Patëm jashtëzakonisht shumë tentime të humbura dhe përqindje të ulët nga tentimet për 3 pikë. Kjo ishte situata që ndikoi në çerekun e tretë dhe të katërt, por ne e kishim lojën nën kontrollë gjatë gjithë kohës e kishim bindjen e plotë që ndeshjen do ta fitonim”, tha trajneri Lazimi.

Goga Basket është skuadra e vetme gjysmëfinaliste nga Shqipëria në Ligën Unike. Në këtë fazë kjo skuadër do të luajë përballë Golden Eagle Yllit për të synuar finalen e parë historike.