Besa merr ish lojtarin e Realit

Pak ditë para ndeshjes së parë të stinorit pranveror në Superligë, skuadra e Besës ka bërë një goditje të madhe.

Klubi nga Peja ka angazhuar basketbollistin amerikan, Venson Hamilton, i cili më parë ka qenë pjesë edhe e gjigantit spanjoll, Real Madrid, njofton faqja zyrtare e klubit.

Hamilton, 37 vjeçar, do të jetë njëri prej basketbollistëve me karrierë më të bujshme në Kosovë që do të luajë këtë stinor.

Ai gjatë edicionit 2008-2009 ka pasur përvojë në Euroleague me Real Madridin, ku në pesë paraqitje me madrilenët, ka regjistruar 1.6 pikë për ndeshje.

Përveç Realit, ka luajtur edhe për skuadra të ndryshme spanjolle si Gran Canaria, Tenerife, Bilbao Basket, Juventut, si dhe për skuadra të tjera nga Greqia, Italia dhe Polonia.

Në rast të kompletimit të dokumentacionit me kohë, Hamilton pritet të jetë i gatshëm për Besën që në ndeshjen e kësaj fundjave ndaj skuadrës RTV 21.