Besa në gjysmëfinale, eliminohet Trepça

Në ndeshja e parë çerekfinale të IPKO Kupës së Kosovës në basketboll u takuan Trepça nga Mitrovica dhe Besa nga Peja.

Ekipi nga Peja, Besa, është bërë gjysmëfinalistja e tretë e Kupës pas Sigal Prishtinës dhe Pejës, pasi e mposhti Trepçën e favorizuar në çerekfinale me rezultat 70-83.

Xehetarët gjatë çerekut të parë të ndeshjes megjithëse ishin në epërsi të lehtë në të shumtën e kohës me anë të pikëve të Arian Tahirit, Alvaro Calvos dhe Jan Orfilas, në fund të këtij çereku Besa arriti ta përmbys epërsinë e Trepçës duke e përmbyll atë me rezultat të barabartë 21-21.

Pasqyrë e ngjashme ishte edhe në çerekun e dytë, pasi mitrovicasit përsëri kaluan në epërsi, por jo edhe duke u shkëputur në rezultat. Pjesa e parë e ndeshjes përfundoi me rezultat 41-37, duke paralajmëruar një finish dramatik.

Më pas Besa i ndezi motorët me anë të Arti Hajdarit, Arian Qallakut dhe qendrës amerikane, Nakiea Miller, të cilët e mbanin barën kryesore të shënimit të pikëve te skuadra pejane.

Djelmoshat e trajnerit Fabian Gjuka e morrën në dorë epërsinë në rezultat duke e përmbyllur çerekun e tretë me tre pikë epërsi, 57-60, ndërsa me fillimin e çerekut të katërt krijuan seri prej 6-0, që mjaftoi për të siguruar një finish të qetë kundër Trepçës, pasi që me anë të trepikëshit të Arian Qallakut edhe 3:25 minuta pa mbaruar ndeshja, epërsia u thellua deri në 15 pikë, 61-76.

Më i merituari në fitoren e madhe të Besës ishte Arti Hajdari i cili shënoi gjithsej 24 pikë, derisa kontribuoi edhe me 5 kërcime e 3 asistime. Atij i ndihmuan edhe Arian Qallaku dhe Nakiea Miller që shtuan nga 18 pikë secili.

Në anën tjetër, të vetmit që u munduan të bëjnë diç më shumë te Trepça, ishin spanjollët Jan Orfila dhe Alvaro Calvo, të cilët luajtën me nga 19 pikë, përkatësisht 16.

Kjo fitore ia siguroi gjysmëfinalen e Kupës skuadrës së Besës, e cila së bashku me Sigal Prishtinën, Pejën dhe fituesin e ndeshjes Bashkimi-Drita, do të jenë katër skuadrat gjysmëfinaliste që do të luftojnë për ta fituar Kupën.

Statistikat ekipore

	TREPÇA	BESA
Çereku i parë	21	21
Çereku i dytë	20	16
Çereku i tretë	16	23
Çereku i katërt	13	23
Kërcime në mbrojtje	24	32
Kërcime në sulm	20	7
Gjithsej kërcime	44	39
Asistime	16	17
Bllokada	2	6
Topa të vjedhur	5	7
Topa të humbur	11	13
Tentime për tre pikë	7/29	6/17
Tentime nga loja	24/79	31/61
Tentime nga gjuajtjet e lira	15/20	15/23

Statistikat individuale te Trepça

1	Jan Orfila	19 pikë	20 kërcime	8 asistime
2	Alvaro Calvo	16 pikë	7 kërcime	1 bllokadë
3	Arian Tahiri	10 pikë	1 asistim
4	Imer Tahiri	5 pikë	1 kërcim
5	Hekuran Binxhija	3 pikë	5 kërcime	2 asistime
6	Samir Zekiqi	7 pikë	2 kërcime
7	Valdrin Haxhiu	8 pikë	5 kërcime	2 asistime
8	Besnik Azemi	2 pikë	4 kërcime	2 asistime

Statistikat individuale te Besa

1	Arti Hajdari	24 pikë	5 kërcime	3 asistime
2	Nakiea Miller	18 pikë	18 kërcime	4 bllokada
3	Arian Qallaku	18 pikë	2 kërcime	2 asistime
4	Blend Matoshi	11 pikë	4 kërcime	1 asistim
5	Altin Morina	10 pikë	8 kërcime	7 asistime
6	Beqë Kovaqi	2 pikë	3 asistime	1 kërcim