S’ka më përforcime në BIBL

Skuadrat që kanë siguruar TOP 6 të Balkan League nuk kanë të drejtë transferimi më. Në konfirmimin e siguruar nga Borozani.com shihet qartë se të gjitha skuadrat që kanë dashur të përforcohen para ndeshjeve të Play-Offit dhe të Final Four afatin e fundit për transferime e kanë pasur dje më 27 mars 2014 që ka përfunduar në ora 18:00.

Kështu, transferimet e përfolura lidhur me kalimin e Gerti Shima dhe Samir Shaptahovic në skuadra tjera të BIBL që janë kualifikuar për në Play-Off - nëse nuk janë të regjistruara deri më datën e dhënë më lartë - nuk do të mund të ndodhin. 

“Sipas Art. 5.3.4 të Rregullores së BIBL çerekfinalet fillojnë më 1 prill 2014, kështu që ndërrimi i lojtarëve në listë të ekipeve mund të bëhet deri më 27 mars 2014, e enjte, 18:00 sipas kohës së Europës Lindore. Pas kësaj date nuk do të ketë mundësi ndërrimi të lojtarëve deri në fund të stinorit 2013/14,” thuhet në njoftimin që BIBL i ka dërguar skuadrave. 

Prandaj të gjitha skuadrat e kualifikuar në Play-Off të Balkan League, Galil Gilboa, Sigal Prishtina, Levski Sofia, Balkan Botevgrad, Teodo Tivat dhe Kumanovo, më nuk do të kenë të drejtë të përforcohen deri në fund të stinorit të BIBL.