Blassingame, opcion i Lutzit!!!

Përforcimi i parë i huaj, duke mos llogaritur shqiptarët, për Pejën ka gjasa të jetë një basketbollist si organizatori amerikan i Cibonës, Jerel Blassingame. 

Amerikani Blassingame 32 vjeçar, ka qenë zgjedhja e parë e trajnerit të ri të Pejës, Danijel Lutz, kur ai ka marrë drejtimin e Cibonës, kanë transmetuar sot mediat kroate. 

“Lutz do të ketë të drejtë t’i blejë katër lojtarë të huaj në Pejë dhe nuk ka aspak dyshim që do të zgjedh më të mirët. Vetë Jerel Blassingame, organizator i Cibonës, që i dha skuadrës agresivitetin e duhur dhe vendosmërinë në momentet kyqe të stinorit, ka qenë zgjedhja e tij. Kjo tregon të tërën…” ka shkruar sot në mes tjerash në njërën nga portalet kroate lidhur me aftësitë e përzgjedhjes së lojtarëve të huaj nga Lutzi 34 vjeçar. 

Blassingame para Cibonës ka bërë karrierë në Poloni te Asseco Prokom dhe Energa Czarni, e para tyre ka luajtur edhe në Ukrainë, Suedi e Finlandë. Vetëm në stinorin e fundit te Cibona, Blassingame ka pasur mesatare prej 13.9 pikëve, 5.3 asistimeve dhe 3.1 kërcimeve për ndeshje. Ai ka qenë pjesë e Euroleague me Asseco Prokomin në fillim të këtij stinori, ku gjithashtu ka shënuar një mesatare të lartë prej 14.5 pikëve për ndeshje dhe 5.4 asistimeve. 

Pas Drilon Hajrizit dhe Endrit Hysenagollit, Peja ka pritur trajnerin i cili tashmë besohet se do të zgjedhë lojtarë cilësorë në luftë për mbrojtjen e titullit të kampionit. Blassingame ka kontratë edhe dy stinorë me Cibonën dhe kjo e bën të pamundur ardhjen e tij.