“Che Bar” trimfon dhe merr biletë për Bukuresht

Kampioni i para dy vjetëve, skuadra Che Bar nga Prishtina, superfinalist i Ferizajit, ka fituar turneun e sivjetmë të Streetballit, Streetball Kosova 2016.

Fikret Shatri, Fisnik Juniku, Albatrit Berisha dhe Etnik Peci, triumfuan pa asnjë humbje në Superfinalen në Ferizaj, ku merrnin pjesë, shtatë kampionët e qyteteve të Kosovës dhe kampioni i vitit të kaluar Vision Group, të cilën skuadër Che Bari e mposhti në gjysmëfinale.

Në finale, Che bari e mposhti kampionin e Prizrenit, ekipin Shmekat, që përbëhej nga basketbollistët aktivë Qëndrim Biraj, Artin Gashi e Altin Morina, si dhe streetballisti Arianit Çollaku.

Ndërkohë, në kategorinë amatore ka triumfuar ekipi mitrovicas MM Cana Kualitet, e përbërë nga Erblin Ademi, Ngadhnjim Shabani, Izet Tahiri dhe Ardit Tahiri.

Kjo skuadër, në finale fitoi me rezultat 12:9, duke e mposhtur ekipin prizrenas “Katërshja”, që përbëhej nga ish-basketbollistët Hyjnor Jasiqi, Pjetër e Palush Doda dhe Kushtrim Aliu.