Derbi në Pejë, interesant në Gjilan

Tre ndeshjet të shtunën dhe një të dielën, janë përcaktuar të luhen në Superligën e Kosovës të basketbollit në kuadër të xhiros së katërt të saj. 

KARAGAÇ

Derbi i javës luhet në Pejë, ku skuadra kampione e Kosovës Peja pret RTV 21-shin të cilën e mposhti në Play-Off të stinorit të kaluar 2-0. 

Peja, që është skuadra me orarin më të vështirë, pasi që ka zhvilluar tre derbi dhe kjo është e katërta me radhë, pritet të mos ketë probleme të mëdha ndaj RTV 21-shit që dështoi ndaj Trepçës në xhiron e fundit. 

Gjithashtu ekipi i Danijel Lutzit pritet që të këndellet nga humbja në debutim ndërkombëtar ndaj Kozuvit të Maqedonisë. E për këtë pejanët do të kenë dëshirë edhe më të madhe për fitore. 

BASHKIM SELISHTA

Ndeshje interesante pritet të luhet edhe në Gjilan ku Drita pret Trepçën e kompletuar me të huaj. Drita që ka shënuar dy fitore deri më tani do të kërkojë fitoren ndaj Trepçës e cila me Israel Martinin hap pas hapi po përparon dukshëm. Kurse tash me përforcimet e reja te ekipi mitrovicas, Jan Orfila dhe Dominique Lacy, si dhe Joshua Brownin që luajti në ndeshjen e kaluar - mund të bëhet arrë e fortë për çdo skuadër në Superligë. 

PALLATI I RINISË 

Sigal Prishtina nuk duhet të ketë asnjë lloj problemi në ndeshje ndaj Besës së ngujuar në fund të tabelës. Pas fitores së madhe në ligën ballkanike, prishtinasit do të kërkojnë që të vazhdojnë serinë  e pamposhtshmërisë në Superligë, duke regjistruar fitoren e katërt nga katër ndeshje, si dhe të mbeten ekipi i vetëm pa humbje. 

Besa ka larguar dy të huaj pas tre humbjeve dhe ka sjellur një. Mirëpo, sipas të gjitha gjasave ata për fitore duhet të presin ndonjë xhiro tjetër. 

SEZAI SURROI

E vetmja ndeshje e së dielës luhet në Prizren, ku Bashkimi pret Kastriotin. Prizrenasit, por edhe ferizajasit kanë nga një fitore dhe dy humbje dhe ndeshja e së dielës lë Bashkimin sado pak favorit ndaj Kastriotit. 

Në këtë ndeshje Mustafë Merovci, që stinorin e kaluar mbrojti ngjyrat e Bashkimit, do të kthehet në Sezai Surroi si kundërshtar i portokallëve, pasi që këtë stinor luan për Kastriotin. 

TABELA AKTUALE

Shikoni gjendjen aktuale të skuadrave para xhiros së katërt.

SUPERLIGA, Xhiro IV