SUPERLIGA

BOROZANI/ Erdis Driza

Dita e debutimeve

27 October, 2013 @9:25

Dita e sotme mund të quhet ndryshe edhe si dita e debutimeve për basketbollin kosovar. Kjo për arsye se gjashtë basketbollistë të huaj, të cilët u transferuan gjatë kësaj jave në skuadrat kosovare, do ta kenë rastin e parë sot që të debutojnë në Superligë.

Derbi pejan

Njëra prej ndeshjeve më interesante të ditës pritet të jetë ajo ndërmjet rivalëve lokal të qytetit të Pejës, Besës dhe kampiones aktuale, Pejës.

Në këtë ndeshje emocione të veçanta do të ketë trajneri i Besës, Boris Kurtovic, i cili do të jetë për herë të parë përballë ish skuadrës së tij, Pejës, të cilën e kishte drejtuar vite më parë.

Charles Funches i Besës do të ketë rastin e debutimit në Superligë po në këtë ndeshje, e cila do të fillojë nga ora 19:00.

Në Prishtinë katër debutues

Në dueli ndërmjet RTV 21-shit dhe Dritës, pritet të debutojnë hiq më pak se katër basketbollistë. Për Teleboysat për herë të parë do të luajnë Keith Gabriel dhe Trey Hampton, të cilët i zëvendësuan gjatë javës turkun, Ersan Ozseven, dhe lituanezin, Marius Kasiulevicius.

Kurse gjilanasit zbrazëtinë e krijuar nga dyshja e larguar, Fabio Wilson dhe Travis Taylor, do të mundohen ta mbulojnë me amerikanët Darrick Thomas dhe Brian Towner.

Të dy skuadrat do të dalin në fushë për fitore, pasi që kanë synimin e përbashkët në fund të stinorit, playoffin. Megjithatë, Drita, së paku duket më e moralshme për këtë përballje, pasi ka një seri prej tre fitoreve rresht, derisa 21-shi u nda kokulur nga palestra, në dy përballjet e fundit, përkatësisht ndaj Trepçës dhe Pejës.

Ndeshja RTV 21 - Drita fillon nga ora 19:00 dhe do të luhet në palestrën 1 Tetori në Prishtinë.

Në Malishevë, rivalët e vjetër

Basketbollisti i vetëm i cili pritet të debutojë në ndeshjen ndërmjet Trepçës dhe Bashkimit është qendra gjigante, Jan Orfila. Ai njëkohësisht do të jetë edhe basketbollisti i parë spanjoll që do të luajë në ndonjë skuadër të Superligës kosovare.

Rivalët e vjetër do të takohen në Malishevë, në mungesë të palestrës së skuadrës vendase nga Mitrovica, Trepçës.

Të dy skuadrat kanë pasur një fillim jo të mirë në kampionat dhe kjo ndeshje do të jetë vendimtare për ta që t’i kthehen ‘ditëve të mira’.

Për ndryshe, Trepça do të luajë për herë të parë si vendase në Malishevë, pasi që deri më tani këtë gjë e bënte në Vushtrri. Kjo ndeshje do të fillojë nga ora 17:00.

Tabela aktuale.

Orari i ndeshjeve të sotme

Ora	Vendi	Përballja	Gjyqtarët
17:00	Malishevë	Trepça - Bashkimi	Hajredin Zeka, Daut Mehmeti dhe Vllaznim Rraci.
19:00	Prishtinë	RTV 21 - Drita	Mehdi Gashi, Edmond Raça, Xhavit Beqiri.
19:00	Pejë	Besa - Peja	Faton Kurshumliu, Astrit Kasapolli dhe Dren Pudarolli.