MEDIA
Dusha i lumtur që ka zgjedhur Prishtinën
13 August, 2016 @15:23
Basketbollisti i ri i Sigal Prishtinës, që u prezentua dje nga klubi, Elvisi Dusha, ka thënë se është jashtëzakonisht i lumtur që ka arritur marrëveshje me ekipin kampion të Kosovës.
Ai në një bisedë me Kohën Ditore ka treguar se gjithmonë ka dëgjuar gjëra të mira për ekipin bardhekaltër dhe nuk ka qenë vështirë të merrte vendimin për të qenë pjesë e kësaj skuadre.
“Besoj se Prishtina është një hap përpara në karrierën time. Kam luajtur në elitë të Britanisë deri më tani, ndërsa tash e tutje do të jem pjesë e Prishtinës, që ka menaxhment të mirë dhe tifozë të shkëlqyer,” ka thënë ndër të tjera basketbollisti i reprezentacionit të Shqipërisë.
Elvisi Dusha është 22 vjeç dhe luan në pozitën e organizatorit të lojës. Ai do të jetë pjesë e kombëtares shqiptare në kualifikime për Eurobasket 2017.
