Edhe një kroat te Bashkimi

Qendra kroate 212 centimetra e gjatë, Denis Vrsaljko, është përforcimi më i ri i Bashkimit të Prizrenit. 

Vrsaljko që stinorin e kaluar në pjesën vjeshtore luajti për Vëllaznimin e Gjakovës, ka arritur në Prizren dhe është parë në rrugët e qytetit sot. 

Qendra 31 vjeçare dallohet për precizitet të lartë nën kosh, pasi ka qenë ndër kryesorët në ekipin gjakovar gjatë stinorit vjeshtor 2012/13, bashkë me playmakerin Marcel Mihalic. 

Ky është transferi i tretë i Bashkimit dhe për çudi të gjithë janë kroat. Bashkimi më parë pat transferuar dyshen Josip Blajic dhe Dino Erceg, që tashmë kanë filluar stërvitjet me skuadrën. Nga vendorët, Bashkimi deri më tani ka transferuar Albatrit Berishën e RTV 21-shit. 

Vrasljko që njihet si luftarak nën kosh më parë ka veshur edhe fanellën e Trepçës dhe bëhet lojtari i parë i huaj që do të luaj për tre ekipe të ndryshme kosovare në vitet e fundit.