Edhe Trepça në BIBL

Skuadra e Trepçës do të tentojë që të futet në BIBL nga stinori i ardhshëm. Renovimi përfundimtar i palestrës “Minatori” do të jetë një arsye shtesë për këtë, derisa njoftimin e ka bërë të ditur Zëri, që ka biseduar me zyrtarin e ekipit mitrovicas, Kemajl Muja. 

“Me rikthimin në palestrën tonë, do të kërkojmë që nga stinori i ardhshëm të jemi pjesë e BIBL,” ka thënë ndër të tjera Muja për Zërin sot. 

Trepça është aktualisht duke u drejtuar nga kroati Neven Plantak, që i pat bërë kampionë të Kosovës për herë të fundit 4 stinorë më parë. 

Aktualisht pjesë e BIBL janë tre skuadrat nga katërshja e madhe e Kosovës, Sigal Prishtina, Peja dhe Bashkimi.