Fitorja e parë me 100+ pikë të shënuara për kampionin

Skuadra e Yllit ka shënuar fitoren e parë të stinorit me mbi 100 pikë të shënuara në ndeshje, duke e mposhtur Dritën e dobët, me rezultat 71-106 [8-28, 19-21, 14-28 dhe 30-29].

Kjo ka qenë fitorja e dytë me radhë e suharekasve, që janë kampionë aktual të Kosovës, ndërsa po japin shenja të këndelljes pas startit të dobët që kishin me tri humbje radhazi, duke e bërë bilansin aktualisht 2-3.

Fitorja e Yllit nuk u diskutua fare që prej fundit të çerekut të parë të ndeshjes, pasi që suharekasit e drejtuar nga Adis Beciragic bënë epërsinë 20 pikëshe pas 10-minutave të para lojë dhe pastaj gjithçka mbajtën nën kontroll për të arritur fitoren me 25 pikë epërsi.

Gëzim Morina bëri triple-double në këtë ndeshje, pasi që luajti pa pushim fare 40-minutat e plota të ndeshjes ku dha 23 pikë, 15 kërcime e 10 asistime.

TABELA AKTUALE dhe REZULTATET

Sa i përket pikëve, më efikasi te Ylli ka qenë Barret Benson me 31 pikë të shënuara, derisa edhe ai kreu lojën me double-double duke rrëmbyer 12 kërcime nën koshin e gjilanasve.

Beciragic gjithashtu, pos Morinës që i dha 40-minuta në ndeshje, shfrytëzoi edhe tërë lojtarët tjerë në dispozicion për minutazhë dhe përvojë në elitë, ku pothuajse të gjithë shënuan pikë.

Te Drita nuk kanë mjaftuar pikët e Marcus Mayersit. Amerikani i bardhekaltërve edhe pse ishte koshashënuesi më i mirë i ndeshjes me 36 pikë të shënuara, ekipi nuk arriti më shumë.

Pas kësaj fitoreje Ylli ka bilans 2-3, ndërsa Drita që tashmë ka bërë dy të huaj në ekip, ende s’ka shijuar fitoren me rikthimin e saj në Superligë, duke qenë se është 0-5 në bilans.