Super Bashkimi, ia shkakton humbjen e parë Trepçës

Bashkimi ka arritur të shënojë një fitore pak të pritur ndaj Trepçës së pamposhtur në kampionat.

Skuadra prizrenase e drejtuar nga trajneri Branimir Pavic ka arritur të tregojë një performancë tepër të mirë në pjesë të parë të ndeshjes dhe të shkojë në pushim me rezultat 48-38.

Edhe pse mitrovicasit u këndellën në pjesë të dytë, ndërsa dy lojtarë të Bashkimit në minutat e fundit dolën pasi morrën nga pesë gabime personale, Trepça e pamposhtur e Lubomir Minchevit është mposhtur në fund me katër pikë dallim, 87-83 [24-17, 24-21, 14-23 dhe 25-22].

TABELA AKTUALE

Avi Tooner dhe Julien Lewis u dalluan me lojë sonte te Bashkimi, por edhe loja e mirë në mbrojtje bëri punën e vetë për fitore të madhe të portokallezinjëve.

Lewis kreu ndeshjen me 22 pikë e tetë asistime, ndërsa Tooner shënoi 16 pikë, 4 asistime e 4 kërcime. Nga vendorët asnjë lojtar nuk arriti të shënojë pikë dyshifrore, ndërsa të gjithë të huajt e ekipit shënuan mbi dhjetë pikë.

Valon Bunjaku e Avi Tooner u larguan nga loja pas pesë fauleve të shkaktuara, por kjo nuk ndikoi në rezultatin përfundimtar edhe pse ata mbetën jashtë loje disa minuta para fundit të ndeshjes.

Te Trepça më efikasi ka qenë Taurus Cockfield që shënoi 19 pikë, ndërsa pikë dyshifrore shënuan edhe Drilon Hajrizi, 14 dhe Samir Zekiqi 15.

Derisa Bashkimi me këtë fitore ka përmirësuar bilansin në 3-2, Trepça ka përjetuar të parën humbje të kampionatit dhe tashmë nuk ka ekip që s’ka së paku një humbje në Superligë 21/22, e mitrovicasit kanë bilans 4-1. Por, me koshdallim më të mirë se Peja, Trepça vazhdon të mbetet lidere e Superligës.