Gezer: Fituam me mbrojtje të përbashkët në fund

Trajneri turk i Golden Eagle Yllit, Fatih Emre Gezer, në deklaratën e tij pas ndeshjes ka thënë se ekipi i tij ka shënuar fitore të rëndësishme ndaj një kundërshtari shumë të vështirë dhe me lojtarë që kanë tepër përvojë.

“Së pari dëshiroj ta përgëzoj kundërshtarin për lojën dhe trajnerin e tyre. Ata kanë lojtarë shumë të mirë dhe me përvojë. Ne luajtëm mbrojtje të mirë në fund, edhe pse jo më të mirën, por arritëm fitoren,” ka thënë fillimisht trajneri i suharekasve.

“Dallimi në lojë u bë në çerekun e katërt se ishim të koncentruar në lojën në mbrojtje. Normalisht jo më të mirën që po e kërkoj, por ajo do të vjen me kohë. Të gjithë kanë ndihmuar në kërcime dhe kemi luftuar nën kosh,” ka thënë ndër të tjera ai.

“Në këtë ligë nëse nuk përgatitet mirë loja taktikisht, në secilën ndeshje do të kemi mjaft vështirësi. Kemi bërë gabime gjatë lojës, kemi humbur raste të lehta për shënim, mbrojtja duhet përmirësuar ende, por për tash me rëndësi është fitorja,” ka shtuar Gezer

Golden Eagle Ylli pas startit të mirë në çerek të parë të lojës, ka humbur epërsinë përgjatë të dytit dhe të tretit. Mirëpo, me lojë të mirë në çerek të fundit ka arritur të kap dhe përmbys rezultatin për të shkuar te fitorja e tretë me radhë dhe e gjashtë në shtatë ndeshjet e fundit.