Jordancho Davitkov trajner i ri i Pejës

Trajneri që kishte kualifikuar Maqedoninë e Veriut në Kampioantin Evropian të vitit 2003, Jordancho Davitkov, është trajner i ri i Pejës.

Verdhezinjtë para pak çastesh zyrtarizuan trajnerin e ri të skuadrës. Maqedonasi 57-vjeçar ka karrierë të bujshme dhe llogaritet si njëri ndër trajnerët më të mirë të të gjitha kohërave në vendin fqinj.

Peja, nisi stinorin me kroatin Edi Dzelalija e vazhdoi me turkun Semsettin Bas, që dha dorëheqje vetëm pas dy ndeshjeve të zhvilluara në Superligë për shkak të arsyeve familjare.

Davitkov do të jetë trajneri i tretë i Pejës për këtë stinor, derisa në secilin moment aty gjindet edhe Petrit Zeqiri që kryen punën e ndihmës-trajnerit të skuadrës, e në rast nevoje edhe atë të trajnerit të parë.

Peja gjysmën e stinorit në Superligës e ka kryer me bilanc 9-5, ndërsa e ka kryer këtë pjesë të stinorit në pozitë të tretë të renditjes tabelare, pas Rahovecit dhe Ponte Prizrenit.

“Jordancho Davitkov është trajner i ri i KB Peja. Ai ka qenë trajner i Maqedonisë së Veriut për vite me radhë dhe ka kualifikuar ata në Evropian të vitit 2003. Ai gjithashtu ka drejtuar Kuvajtin duke arritur pozitën e tretë në garat e shteteve të Lindjes së Mesme,” është thënë në njoftimin e Pejës.

Përveç tjerash Davitkov është shpallë katër herë kampion i Maqedonisë Veriore me Rabotnickin, me të cilët ka edhe katër Kupa shtetëore të fituara.