Koha për Superligë

Këtë fundjavë fillojnë emocionet e basketbollit të Kosovës. Pas miqësoreve të shumta dhe rezultateve beafsuese në ato, skuadrat besohen të jenë gati për edicionin pranveror të Superligës. 

Peja e stërforcuar!

Padyshim, derbi i xhiros së parë pranverore, ose e XV në përgjithësi e kampionatit llogaritet ajo ndërmjet Pejës dhe RTV 21-shit që do të zhvillohet të shtunën me fillim prej orës 20:00 në palestrën Karagaç të Pejës. 

E përforcuar me ish lojtarin e stërvitur në NBA, Cyril Awere dhe nipin e të famshmit Dikembe Mutombo, Harouna, Peja llogaritet favorit kur kihet parasysh forca e lojtarëve vendorë të saj nën udhëheqje të Dardan Berishës fantastik. 

Teleboysat kanë ekip!

Në anën tjetër, RTV 21 ka bërë përforcime në dukje të mira - që pritet të tregohen gjatë kampionatit. Koshashënuesi më i mirë i ligës elite malaziase, Brandon Roberson, pastaj qendra turke Ersan Ozseven janë letrat kryesore të Teleboysave. 

Gjithashtu, ata kanë përforcuar edhe bankën me lojtarë vendorë si Urim Zenelaj dhe Elvan Iljazi nga Bashkimi. Kur këtyre i shtohen edhe basketbollistët tjerë - dueli nuk pritet të jetë i lehtë për Pejën, por sidoqoftë do ta arsyetojë epitetin e ndeshjes kryesore të javës. 

Ndeshjet tjera

Në ndeshjet tjera Sigal Prishtina pret Kosovën e Vushtrisë, pastaj Trepça është nikoqir i Dritës në Vushtrri, derisa Sigkos Bashkimi pret Vëllaznimin, që duket të jetë kandidati kryesor për rënie nga elita, sipas përforcimeve të bëra gjatë afatit kalimtar dimëror.

BKT SUPERLIGA, XHIROJA XV