Konfirmohet: Kapiti i gatshëm për finale

Një lajm i mirë për Kosovën U18 para ndeshjes finale ndaj Qipros!

Dardan Kapiti, një nga lojtarët më të dalluar të kësaj grupmoshe të Kosovës, është i gatshëm për ndeshjen e sontme dhe do të mund ta ndihmojë Kosovën në ndeshjen shumë të rëndësishme finale ndaj Qipros.

Kjo u konfirmua ekskluzivisht për Borozani.com nga Ilmen Bajra, ndihmëstrajneri i Përfaqësueses U18 së Kosovës, i cili tha që pas trajtimeve me fizeoterapeutë dhe një kontrolle mjekësore, është vendosur që Kapiti të mund të luajë sonte.

Lojtari në fjalë pati probleme me lëndim në disa nga ndeshjet e kaluara të Kosovës U18, ndërsa në ndeshjen e fundit ndaj Irlandës luajti shumë pak, gjë që krijoi dyshime për paraqitjen e tij në ndeshjen finale ndaj Qipros, mirëpo për fat të mirë të Kosovës Kapiti është i gatshëm dhe do të jetë në parket sonte.

Ndeshja finale mes Kosovës dhe Qipros luhet sonte me fillim nga oa 19:30 në Pallatin e Rinisë dhe të Sporteve në kryeqytet.