Kosova kryen detyrën, kthehet me fitore nga Lituania

Në stadiumin më të madh ndër shtetet baltike, Kosova sot në Kaunas shënoi fitore ndaj Lituanisë vendase.

Këtë të fundit të drejtuarit nga Franco Foda e mposhtën me rezultat 1-2.

11-SHET STARTUESE

Kosova dominoi në posedim që nga fillimi, e epërsia dhe goli i vetëm i pjesës së parë erdhi në minutën e 20’, kur kombinimi Edon Zhegrova & Florent Muslija ishte fatal për vendasit. Në stilin e tij, Zhegrova e çoi topin me të majtën në portë për 0-1 të Kosovës.

Në minutën e 35’ lituanezët patën një gol të anuluar për shkak të pozitës jashtë loje, rasti i tyre më i mirë në pjesën e parë, ndonëse patën ngritje të lojës në minutat e fundit të kësaj pjese.

Përveç golit të shënuar, Kosova në pjesën e parë nuk krijoi shumë raste konkrete për shënim, përkundër dominimit në qarkullim të topit.

LIGA E KOMBEVE - TABELAT E GRUPEVE

Në pjesën e dytë, ngjashëm si në fundin e pjesës së parë, lituanezët e kërkonin golin prej krahut të djathtë, me Donat Rrudhanin që sot nuk ishte në ditën e tij më të mirë. Kjo ndikoi që ai të zëvendësohej nga Florent Hadërgjonaj në minutën e 59’.

Gjithsesi, golin e para në këtë pjesë e gjeti Kosova. Epërsia u dyfishua nga Ermal Krasniqi, që u inkuadrua nga banka rezervë. Krasniqi me të djathtën shënoi për 0-2 (65’).

Vendasit rezultatin e ngushtuan në minutën e 84’, kur një pasiguri të portierit Saipi e shfrytëzoi maksimalisht Golubickas, i cili shënoi për 1-2. Për fatin e mirë të Kosovës, Lituania nuk pati fuqi për më tepër dhe kështu ndeshja u mbyll me fitore të Kosovës.

Mungesë e theksuar për shkak të lëndimit sot te Kosova ishte ajo e Vedat Muriqit, ndërkohë debutoi me fanellën e “Dardanëve” portieri Amir Saipi. Ndërkohë pas kartonit që e mori sot, Kosovës ndaj Qipros do t’i mungojë Elvis Rexhebeçaj.

Kështu, Kosova tashmë ka 6 pikë pas 3 ndeshjeve të para në Grupin C2 të Ligës së Kombeve.

Ndeshjen e ardhshme Kosova e luan në Prishtinë ndaj Qipros më 15 tetor, e më pas dy ndeshjet e fundit të grupit i luan në nëntor.