Kuqezinjtë mposhten nga Portugalia dhe eliminohen

Shqipëria është mposhtur edhe në ndeshjen e dytë të nëntorit në kuadër të Grupit A të parakualifikimeve për Botërorin 2023.

Me këtë humbje, kuqezinjtë janë eliminuar nga mundësia për kualifikim tutje, pasi që tashmë kanë bilans 1-3 dhe të dyja ndeshjet ndaj rivalit direkt Portugalisë, i kanë të humbura.

Pas pjesës së parë pak më stabile dhe çerekut të tretë të fituar, kuqezinjtë e drejtuar nga Afrim Bilalli në 10-minutëshin final të ndeshjes u futën me minus 7 pikë.

Por në çerekun e fundit portugezët hynë me plotë forcë për t’i dhënë goditjen përfundimtare Shqipërisë 70-88 [16-22, 21-26, 25-21 dhe 8-19] dhe për të siguruar kualifikimin, dy xhiro pa përfunduar faza grupore para-kualifikuese.

Selektori Mario Gomes i dha mundësi të gjithë lojtarëve të Portugalisë që të paraqiten në ndeshje, derisa më efikasi ka qenë Pedro Bastos me 16 pikë të shënuara, kurse më i miri në përgjithësi Diogo da Costa Ventura me 14 pikë, 4 kërcime e 7 asistime - që përfundoi ndeshjen me efiçencë, 20.

Te Shqipëria Gerti Shima me 18 pikë e 6 asistime ka qenë më efikasi, ndërsa me nga 17 pikë ndeshjen e kryen Juljan Hamati dhe Celis Taflaj. Shima ishte edhe lojtari më i mirë i kuqezinjëve në këtë ndeshje, duke arritur indeksin e efiçencës, 21.

Dy ndeshjet e fundit për kuqezinjtë, që zhvillohen në shkurt të vitit të ardhshëm do të jenë sa për prestigj, derisa tashmë puna e të kualifikuarve ka marrë fund.

TABELA AKTUALE:

1. Bjellorusia 4-0
2. Portugalia 3-1
3. Shqipëria 1-3
4. Qipro 0-4.