Lehtë ndaj Dritës

Ish kampionja e Kosovës në basketboll, Sigal Prishtina ka shuar Dritën në ndeshjen e fundit të stinorit vjeshtor për këto të dyja të përfunduar pak më parë në Pallatin e Rinisë dhe të Sporteve, 92 - 44

Prishtinasit kanë filluar furishëm takimin, ndërsa kanë shfrytëzuar mungesën e Devin Chambers dhe Craig Blackmon te Drita e cila ka luajtur vetëm me qendrën Laurence Donelson sot.

Fahri Breca ka shënuar më së shumti pikë te skuadra e udhëhequr nga Arben Krasniqi, 17 sosh si dhe ka regjistruar 2 asistime. Dyshja amerikane e trapezit prishtinas, Adam Waleskowski dhe Jeremy Price kanë regjistruar double-double. Waleskowski ka shënuar 13 pikë dhe 17 kërcime, derisa Price 14 pikë dhe 15 kërcime. Pikë të dyshifrore te Prishtina kanë shënuar edhe Edmond Azemi 14 dhe Devan Downey 13.

Drita e cila është paraqitur me vetëm një të huaj, Laurence Donelson, nuk ka arritur t’i bëj ballë ish kampionit, për asnjë moment. Te gjilanasit më të dalluar kanë qenë Laurence Donelson me 14 pikë, pastaj Driton Sylejmani me 13 si dhe Arian Mehmeti me 12 pikë.

Mehmeti i cili ka marrë gjatë javës mirënjohje si sportist i dalluar i komunës së Gjilanit, ka vërtetuar edhe njëherë se është ndër talentët më të mëdhenjë që ka basketbolli kosovar, duke luajtur 40 minuta të plota në ndeshje.

Me këtë fitore, Prishtina ka regjistruar fitoren e 13 krahas një humbjeje që ka, derisa Drita ka bilanc prej 3 fitoresh dhe 11 disfatave.