Lideri mposht kampionin

Fituesja e stinorit të rregullt 2018/19 Prishtina me lojë të mirë në pjesë të dytë të ndeshjes, veçanërisht në çerekun e fundit ka shënuar fitoren e 25 nga 25 ndeshje të zhvilluara.

Bardhekaltërit kanë hasur në rezistencë të fortë nga kampioni aktual i Superligës, Bashkimi, por krejt kjo në çerekun e fundit ra në ujë pasi që Prishtina e udhëhequr nga Dardan Berisha në parket ka shkuar drejt fitores së padiskutueshme në minutat e fundit, 91-102.

Dardan Berisha ishte më efikasi te Prishtina me 21 pikë të shënuara dhe 2 asistime, derisa luajti tërë ndeshjen pa pushim. Meriton Ismaili tregoi lojë shumë të mirë, duke shënuar 18 pikë në 24 minutat sa ishte në parket, ndërsa ndeshjen me double-double e kreu Denis Krestinin që shënoi 12 pikë dhe kapi 14 topa nën kosh për të treguar dominimin e tij në trapez.

TABELA AKTUALE

Te Bashkimi loja superiore e Jordan Cappsit me 31 pikë, 12 kërcime e 2 bllokada shkoi më kot. Portokallezinjtë përkundër luftës së treguar nuk arritën fitore në fund.

Përveç Cappsit, Drilon Hajrizi është dalluar me lojën e tij standarde. Mitrovicasi shënoi 20 pikë, 6 kërcime e 5 asistime për Bashkimin sonte, ndërsa qendra amerikane Lamar Wofford dha 15 pikë e 8 kërcime.

Derisa Prishtina vazhdon me perfeksion stinorin 25-0, Bashkimi është barazuar me rivalin lokal në bilanc, 12-13 që është gati të vulos këtë duel në çerekfinale të PlayOffit.