Maxhuni shkëlqen nën vëmendjen e Lauri Markkanen

Në ndeshjen e zhvilluar në mëngjesin e sotëm, skuadra e Long Beach State u mposht nga Santa Barbara, vendi i parë në tabelë, me rezultat 70-80.

Skuadra ku aktivizohet Edon Maxhuni zhvilloi një pjesë të parë të dobët, gjë që ndikoi në epilogun final të duelit, ndërsa humbja në këtë duel bën që kjo skuadër në 3 ndeshjet e mbetura të luftojë për Play-Off, me luftën për vendin e parë që tashmë ka përfunduar.

Edoni edhe në këtë duel ishte startues dhe luajti për gjithsej 31 minuta, gjatë të cilave tregoi një tjetër paraqitje fenomenale, sidomos në pjesën e dytë. Në pjesën e parë fundori me nënshtetësi finlandeze nuk e shënoi asnjë pikë, ndërsa në pjesën e dytë shënoi plot 20 pikë, si dhe shtoi 3 kërcime e 2 asistime. Maxhuni ishte i saktë në 4 nga 5 tentimet e tij për 2 pikë dhe në 4 nga 7 tentimet e tij për 3 pikë.

E veçantë për Edonin në këtë duel ishte prania e Lauri Markkanen, basketbollistit finlandez të Chicago Bulls, në tribuna. Markkanen ndodhet në Kaliforni për shkak të vikendit All Star në NBA, ndërsa sipas burimeve të Borozani.com, Markkanen ka darkuar me Edon Maxhunin para ndeshjes së mbrëmshme.

Përkrahjen e tij për Edonin Markkanen e ka shprehur edhe përmes një postimi në Instagram gjatë ndeshjes së zhvilluar mbrëmë:

Sa i përket ndeshjes së mbrëmshme, në videon e mëposhtme janë paraqitur disa akcione nga kjo ndeshje, ndër të cilat i përfshirë është edhe Maxhuni.