Michael Jordan (3) Ai s’ishte vetëm basketbolli, ai ishte sporti

Pjesa e tretë (LEXO: Pjesën e parë; LEXO: Pjesën e dytë)

Vjen koha e lëndimit. Jordan e then shputën. Shërohet në kohë rekord, duke befasuar edhe mjekët e skuadrës. Rehabilitohet.

• BASTI MË I LEZETSHËM •

Ekonomi i Chicagos kujton kur Jordani ishte paraqitur me gips në këmbë në palestër. Michael kishte hapur derën dhe shikonte nga dera, përmallueshëm. Ekonomi në tentim për të bërë shaka me Jordanin dhe duke ditur dëshirën e tij për të luajtur, i tha: “Mos vallë dëshiron të shënosh prej derës së hyrjes në kosh?” Jordan mati me sy distancën. Nuk kishte 20 metra largësi. I tha ekonomit: “Po, për 250 dollarë”.

Basti u vë, por ekonomi zemërgjerë i dha atij tre mundësi, që u treguan të jenë “fatale” për ‘te. Në të tretën, u dëgjua ajo çpuf e rrjetës në palestrën pa asnjë zhurmë tjetër, ndërsa MJ vite më pas do të tregon se ato ishin paratë më të ëmbla që i ka fituar në karrierë.

• RRITJA E MESATARES SË SHIKUESVE •

Në kohën kur erdhi Jordan te Chicago Bulls, ekipi kishte si mesatare 6 mijë e 300 shikues për ndeshje. Shpejt mesatarja u rrit në 17 mijë e 458, që ishte kapaciteti i plotë i palestrës së vjetër.

Amerikanët mbajnë gjithfarë statistikash dhe shpejt mesatarja u rrit në 18 mijë, që do të thotë se kishte njerëz që blenin biletë çdo ndeshje me rrezikun të qëndronin në këmbë përgjatë gjithë takimit – arsyeja dihej: për të shikuar të madhin Air Jordan, fluturimin e tij nëpër palestra.

• PËRFORCIMI I PIKAVE TË DOBËTA •

Kur arriti në NBA Jordan ishte vrapues i shpejtë dhe kërcyes i madh, thjesht fluturonte. Por, në mbrojtje ishte jo i mirë. Në verë të vitit 1987 ai punoi deri në pafrymë në mbrojtjen e tij personale dhe që në vitin e ardhshëm, ai u shpall mbrojtësi më i mirë i ligës! Po të njëjtin vit ai u bë edhe koshashënuesi më i mirë i stinorit dhe me këtë kombinim, mbrojtësi dhe koshashënuesi më i mirë – u bë i vetmi.

“Titulli, kjo është ëndrra dhe synimi im” – tha Jordan.

• MBI STATISTIKA •

E tërë statistika ishte kundër tij. Vetëm një herë në histori koshashënuesi më i mirë i ligës kishte marrë edhe titullin, Kareem Abdul Jabar me Milwaukeen.

“Më duhet ta fitoj titullin” – thoshte Jordan kur gazetarët ia tregonin këtë statistikë.

• ARDHJA E HIPPIE NGA NEW YORKU dhe TITUJT •

E kur thuhej se njëri ndër lojtarët më të talentuar të NBA-së do të mbetet pa titull kampioni, në Chicago vjen si trajner, hippie i dikurshëm i New Yorkut, Phil Jackson. Ai barrën e skuadrës e largoi nga Jordani, duke e shpërndarë proporcionalisht edhe te Scottie Pippen, Horace Grant e John Paxson.

Demat e Chicagos eksploduan. Bullmania u bë simbol i viteve të ’90-ta. Chicago u bë kampion tre herë radhazi: 1991, 1992 dhe 1993. MJ u bë MVP i kampionatit dhe i PlayOffit. Sukses i plotë.

• ARDHJA E EVROPIANIT MË TË MIRË dhe TRAGJEDIA •

Në verë të vitit 1993 për të përforcuar ekipin, Chicago Bulls blen basketbollistin më të mirë në Evropë. Kroati Toni Kukoc bëhet anëtar i ri i demave. Por, ardhja e tij kaloi në hije, pasi që në këtë verë vdes babai i Michaelit.

Babai i Michaelit u gjet i vdekur, i vrarë në veturë nga disa plaçkitës, që shumë më vonë u kapën nga policia. Michael Jordan u humb. Mbeti pa njeriun që e donte më së shumti. Në tetor të vitit 1993 thërret konferencë për shtyp.

• VENDIMI •

“Po tërhiqem nga basketbolli. Tash e tutje do të luaj bejsboll profesionist për ekipin e Chicago White Soxit” – ishin fjalët e MJ-it në këtë konferencë që dridhën jo vetëm NBA-në, por tërë botën e basketbollit dhe më gjërë, sportin.

Largimi i Jordanit nga NBA, ishte “termet” i llojit të vetë. Michael Jordan nuk ishte më një basketbollist superior, ai ishte shumë më shumë. Ai nuk ishte as sportist. Ai ishte vetë sporti. (Vazhdon nesër, pjesa e katërt dhe e fundit e serisë së shkrimeve për Michael Jordanin)