Kendrick Jones: Mund t’i mposhtim të gjithë

Kendrick Jones, amerikani i cili erdhi pa shumë bujë në skuadrën e re të BKT Superligës dhe në përgjithësi të basketbollit kosovar, RTV 21, ka shpërthyer në ndeshjet e fundit për ekipin e tij. Borozani.com

Ai ka qenë më meritori për fitoret e mëdha të ‘Teleboys’-ave ndaj Trepçës dhe Pejës, ndërsa për pak ka qenë t’i shkaktojë befasi edhe Bashkimit.

—

Borozani: Keni arritur fitore shumë të rëndësishme në stinorin pranveror ndaj Pejës dhe Trepçës dhe ju ishit ndër më meritorët për këtë, mendimi juaj? 

Jones: Po, kanë qenë me të vërtetë fitore të mëdha. Neve na duhej një shtytje për të arritur pozitën e katërt në tabelë dhe këtë e arritëm me këto fitore. Bashkëlojtarët e mi kanë kryer punë të mirë duke më gjetur mua në fushë dhe kështu unë u tregova. Ndërsa trajneri Adin (Adinovic) më tha të luaja lojën time, por pak më agresive kështu që arritëm te fitoret.

Mund t’i fitojmë të gjithë

Jones i cili u paraqit në Akademinë Europiane të vitit 2011, ku u zhvillua me trajnerin Srdjan Premovic, aty filloi karrierën europiane. Ai para se të vijë në Europë ka luajtur për ekipe në Meksiko e Kolumbi.

Borozani: Pas fitores ndaj Pejës, mendoni që mund të fitoni edhe ndonjë ndeshje ndaj katërshes së madhe të basketbollit kosovar?

Jones: Definitivisht, po. Fitorja ndaj Pejës na ka sjellë vetëbesim të madh dhe mendoj se tash mund ta fitojmë çdonjërën nga katërshja.

Borozani: Si po ju duket BKT Superliga e Kosovës në përgjithësi?

Jones: Liga e basketbollit të këtushëm është e mirë, fizikisht e fortë dhe mjaft kompetitive. Duhet të luhen ndeshjet më shpesh.

Problemi më i madh, Dardan Berisha

Borozani: Viktima juaj e ardhshme?

Jones: Ndeshja jonë e madhe në radhë është ajo ndaj Sigal Prishtinës. Në ndeshjen e parë na fituan për vetëm pesë pikë epërsi, por atëherë nuk kam qenë në ritmin tim, në të cilin jam tash.

Borozani: Kundërshtari më i vështirë për ju në BKT Superligën e Kosovës?

Jones: Dardani i Pejës. Ai është koshashënues i madh, mund të shënojë nga jashtë dhe brenda. Ekipi i tij bën gjithçka që ai të mbetet i lirë. Ai mund ta fitojë çdo ndeshje

Borozani: E cili është lojtari më i mirë në BKT Superligë?!

Jones: Më i miri në këtë ligë... Do të them: unë. Unë luaj mbrojtje të mirë, shënoj, organizoj dhe kërcej. Mund të bëj shumë gjëra që i duhen ekipit për të fituar.

—

Amerikani i gjatë 190 centimetra ka qenë violina kryesore e orkestrës së 21-shit në ndeshjet e fundit të ekipit të tij. Ai ndaj Pejës regjistroi 28 pikë, 5 kërcime e 2 asistime; në ndeshje ndaj Trepçës shënoi double-double prej 33 pikëve dhe 12 kërcimeve ndërsa ndaj Bashkimit 15 pikë e 4 kërcime.

RTV 21 është në luftë për play-off dhe ndeshjen e radhës e luan ndaj Vëllaznimit. Ata janë në vendin e pestë dhe vetëm dy pikë larg Trepçës që gjindet në pozitën e katërt në tabelë.