Në 4 xhirot e fundit, vetëm 1 fitore si mysafir!

Kanë mbetur edhe dhjetë xhiro deri në fund të stinorit 2024/25 të Superligës! Drita udhëheq renditjen me 57 pikë, ndërkaq ndjekësi i parë i saj është kampioni aktual Ballkani me 44 pikë. Borozani.com

Deri në fund të stinorit në lojë janë edhe 30 pikë! Matematikisht, gjithçka është e mundur, por sa janë të realizueshme këto në fushë të lojës, mbetet të shihet në dhjetë xhirot e fundit të Superligës.

Njëjtë, edhe lufta për mbijetesë është e ashpër. Pos Feronikelit’74 që duket ta ketë më vështirë mbijetesën me 14 pikë në pozitën e dhjetë (të fundit), Prej pozitës së katërt deri në pozitën e nëntë, më shumë se gjysma e Superligës kanë vetëm pesë pikë dallim mes vete!

Prishtina në pozitën e katërt të renditjes ka 35 pikë, ndërkaq Llapi i parafundit në tabelë ka 30 pikë.

TABELA AKTUALE E SUPERLIGËS

E se sa e vështirë për të siguruar tash pikë në terrenet si mysafir mund të shihet nga fakti që në katër xhirot e fundit të Superligës, vetëm një fitore është realizuar si mysafir. E në gjashtë xhirot e fundit, vetëm dy fitore si mysafirë janë arritur në Superligë!

Pra, prej 1 marsit deri sot janë zhvilluar 25 ndeshje të Superligës dhe vetëm Gjilani dhe Dukagjini kanë arritur fitore si mysafir! Në katër xhirot e fundit, në 20 ndeshjet e fundit, vetëm një - Dukagjini! Këta të fundit kishin fituar ndaj Prishtinës më 12 mars në “Fadil Vokrri”.

Në xhiron që vjen mbetet të shihet se si do të jenë rezultatet, në përballjet që luhen prej 4 deri më 6 prill, ku takohen: Feronikeli’74 - Drita, Malisheva - Prishtina, Gjilani - Ferizaji, Ballkani - Suhareka dhe Dukagjini - Llapi. Kjo xhiro gjithashtu do të jetë e fundit për ciklin e tretë të ndeshjeve të Superligës dhe pas saj luhen nëntë xhirot e fundit të kampionatit ku ekipet për herë të fundit këtë stinor takohen me njëri-tjetrin.